“Mən, İsa Qəmbər, Əli Kərimli və Pənah Hüseyn Avropa Birliyinin nümayəndələri ilə görüşəndə dedik ki, bu birliyə inteqrasiyamızda əsas hədəflərdən biri Dağlıq Qarabağ münaqişəsinin ədalətli həll olunmasıdır. Onlar bizə həmin vaxt dedilər ki, siz heç vaxt Avropa Birliyi çərçivəsində Dağlıq Qarabağ məsələsini qaldıra bilməzsiniz. Səbəbini soruşduqda şok yaradacaq bu cavabı verdilər ki, siz bizə sənəd vermisiniz və bir şərtlə Avropa Birliyinə üzvlüyə razısınız ki, heç vaxt Dağlıq Qarabağla bağlı məsələ qaldırmayacaqsınız. Bir-birimizin üzünə baxdıq. Açığı şübhələndim ki, İsa Qəmbər, yaxud Əli Kərimli sənəd imzalayıb. Belə bir sənədə qol çəkmədiyimizi deyəndən sonra bildirdilər ki, sizin bir birliyiniz var, ora 29 təşkilat daxildir, sədri də İlqar Məmmədovdur, o bizə belə bir sənəd verib. Sonralar İlqar Məmmədovun özü də bunu təsdiqlədi, yəni belə bir sənədə qol çəkdiyini”.
Bu sözlər Azərbaycan Demokratik Partiyasının sədri (ADP) Sərdar Cəlaloğluya məxsusdur. Məsələ ilə bağlı REAL-ın icraçı katibi Natiq Cəfərli açıqlama verib. O , səsləndirilən fikirlərin sərsəm olduğunu bildirib: “İlqar Məmmədov hansı səlahiyyət sahibidir ki, hər hansısa bir sənədə qol çəksin və ya öhdəlik götürsün. Bu fikirləri səsləndirən insanın dünyagörüşü, bilik səviyyəsi, həyatı anlaması ilə bağlı ciddi şübhələrim var. Çünki məntiq deyilən bir anlayış mövcuddur. İlqar Məmmədov həbs olunana qədər REAL hərəkatının sədri olub, ondan qabaq da müxtəlif beynəlxalq təşkilatlarda müxtəlif vəzifələrdə çalışıb. Yəni rəsmi dövlət strukturlarında fəaliyyəti olmayıb ki, öhdəlik də götürsün. Bu baxımdan səsləndirilən fikirlər sərsəmdir və buna cavab vermək açığı, çətindir”.
N.Cəfərli qeyd edib ki, İlqar Məmmədov qədər Dağlıq Qarabağ məsələsini dünya birliyində, müxtəlif ölkələrdə keçirilən konfranslarda kəskin şəkildə qaldıran ikinci bir azərbaycanlı siyasətçi olmayıb: “Nə dövlət strukturlarında, nə də müxalif strukturlarında belə bir siyasətçi var. Hətta 2011-ci ildə Ermənistanda NATO konfransında İlqar Məmmədov Zəngəzur məsələsini qaldırdığı üçün ciddi təzyiqlərə məruz qalıb. Türkiyəli deputatların köməyi ilə o konfransdan təxribatsız çıxmağa nail olub. Yəni Azərbaycanda İlqar Məmmədov qədər Dağlıq Qarabağ, o cümlədən Zəngəzurun geri qaytarılması məsələsində kəskin mövqe tutan çox nadir siyasətçilər olub. Ona görə də belə sərsəm açıqlamalar cavab vermək vaxt itkisidir”.Modern.az
Tətbiqimizi yükləyə bilərsiniz
