NATO-nun baş katibi Yens Stoltenberq alyansın Şimali Koreya ilə münaqişənin həllində iştirakını istisna edib. “Yeniavaz.com”un RİA Novosti-yə istinadən verdiyi məlumata görə, Y. Stoltenberq qeyd edib ki, ötən həftə Ağ evdə xeyli saat danışıqlar aparıb və NATO-nun Şimali Koreyaya münasibətdə rolu barədə debatlar olmayıb. Y. Stoltenberq əlavə edib ki, NATO Pxenyanın BMT-nin qətnamələrini daim pozmasını müzakirə edir.
Xatırladaq ki, Şimali Koreya aprelin 28-də ballistik raketlərin növbəti sınağını keçirib. Amerikalı və yapon hərbçilər hesab edirlər ki, ballistik raket buraxıldığı yerdən 50 kilometr aralıda Şimali Koreya ərazisinə düşüb. Raketin növü hələ müəyyən edilməyib.