2015-ci ildə dünya əhalisinin 43 faizini təşkil edən internet istifadəçilərinin sayı 2020-ci ildə 60 faizə çatacağı gözlənilir. “Yeniavaz.com”un Türkiyə mətbuatına istinadən verdiyi xəbərə görə, bu barədə Beynəlxalq Telekommunikasiya İttifaqının (BTİ) statistik məlumatlarında deyilir. BTİ-nin məlumatında qeyd edilir ki, 1995-ci ildə dünya əhalisinin 1 faizi internet xidmətlərindən istifadə etdiyi halda, 2000-ci ildə bu rəqəm 7 faizə çatıb: “1989-cu ildə icad edilən internetə çıxışı olan insanların sayı 2015-ci ildə 3,2 milyarda çataraq dünya əhalisinin 43 faizini təşkil edib. Təxminlərə görə, 2020-ci ilədək internetə çıxış imkanı olan insanların sayı 4,1 milyarda çatacaq ki, bu da dünya əhalisinin 60 faizini təşkil edəcək”. İnterneti kəşf edən Tim Berners-Linin qurduğu “World Wide Web Foundation”ın statistkalarından istifadə etdiyi “internet live stats” adlı sayta əsasən, dünyada ən çox internet istifadəçisinin olduğu ilk 10 ölkə aşağıdakılardır: Çin (721,4 milyon), Hindistan (462,1 milyon), ABŞ (286,9 milyon), Braziliya (139,1 milyon), Yaponiya (115,1 milyon), Rusiya (102,2 milyon), Nigeriya (86,2 milyon), Almaniya (71 milyon), İngiltərə (60,2 milyon), Meksika (58 milyon).