"Hökumət əsas diqqəti əksdollarlaşmaya yönəltməlidir"

"Neft Fondundan 2017-ci ildə makroiqtisadi sabitliyin təmin edilməsi məqsədilə Mərkəzi Banka 7,5 mlrd. manat (4,5 mlrd. USD-yə yaxın) transfert ayıracaq. Bu təxminən ayda 352 milyon dollar edir". "Yeniavaz.com" xəbər verir ki, bunu iqtisadçı ekspert Samir Əliyev bildirib: "Hesablamalarımıza əsasən, valyuta bazarının aylıq kəsirinin 300-400 milyon dollar olduğunu yazmışdıq. Deməli, bu transfert gözlənilməz hadisələr (neftin kəskin ucuzlaşması, siyasi böhran, maliyyə panikası və s.) baş verməsə, bazarı 2017-ci ildə sakitləşdirə biləcək. Bankların dollar satışı bərpa ediləcək. Qara bazarın əhəmiyyəti azalacaq".

Samir Əliyevin ehtimalına görə, Mərkəzi Bank vəsaitləri bir neçə istiqamətdə istifadə edəcək:

- ehtiyac yarandıqca hərraca əlavə vəsait çıxartmaq,

- dövlətin və bəzi bankların (məsələn, Beynəlxalq bankın) xarici öhdəliklərini qarşılamaq,

- banklara dollar likvidliyi (kredit və ya depozit vasitəsilə) vermək".

Ekspert bildirib ki, valyuta çatışmazlığını Neft Fondunun aktivləri və Mərkəzi Bankın ehtiyatları hesabına müvəqqəti aradan qaldırmaq olar: "Ancaq bu, problemin ömrünü uzatmaq və onun taleyini dünya bazarlarında neftin bahalaşmasına bağlamaqdan başqa bir şey deyil. Problem sistem xarakter daşıdığından məsələnin həlli köklü yanaşma tələb edir. Manatın məzənnəsinin sabitliyi yalnız dayanıqlı makroiqtisadi sabitlik və iqtisadi inkişaf fonunda mümkündür. Hökumət təxminən 1 il vaxt qazandı. Hətta bu təşəbbüsdən sonra da manatın tam üzməsini iddia etmək olmaz. Manat Mərkəzi Bankın dəstəyi ilə üzməkdə davam edəcək. Bu addımlardan sonra manatın bahaşması real deyil. Ola bilər epizodik bahalaşma baş versin. Amma tendensiya ucuzlaşamq istiqamətində olacaq. Sadəcə, Neft Fondunu bu dəstəyi imkan verəcək ki, manat tədricən ucuzlaşsın".

Samir Əliyev deyib ki, problemin həlli əksdollarlaşma siyasətindədir: "Deşikli qaba nə qədər su töksək, bir müddətdən sonra qabda yenə də su azalacaq. Ona görə də o deşikləri tutmaq lazımdır. Həmin deşiklər isə bizim nümunədə kapital axını və dollarlaşmadır. Hökumət əsas diqqəti əksdollarlaşma tədbirlərinin gücləndirilməsinə yönəltməlidir. Neft Fondunun pulu hesabına valyuta bazarını dollarla təmin siyasəti isə sonda uğursuzluğa düçar ola bilər və təhlükəsizlik yastığının "əriməsinə" gətirib çıxara bilər".