Azərbaycanın hansı rayonunda nə qədər erməni yaşayır? SİYAHI

"Çuda Peçka”nın 27 əməkdaşı istintaqda dindirilib

Qatardan qaçan “Qoca” həbsdə “nadzor”u öldürübmüş...

Bazar ertəsi, 23 oktyabr 2017
TR EN RU

Menu

Bazar ertəsi, 23 oktyabr 2017
EN TR RU

Yazarlar

Nicat İntiqam

Könül Xasıyevanın demədikləri

18.10.2017 20:41

Dünən çayxanada idik, çay təzə gəlmişdi ki, obyektin sahibi televizoru açdı. Bayaqdan içəridə səs-küydən ağız deyəni qulaq eşitmirdi, elə ki, efirdən Könül Xasıyevanın səsi gəldi, hamı sakitləşdi. Xeyli müddətdir xəstəliyi ilə əlaqədar efirlərdə az-az görünən Könül Xasıyeva əlil arasında canlı efirə çıxmışdı, çox kövrək danışırdı, elə izləyənləri də kövrəldirdi.

Könül xanım dedi ki, kirayədə yaşayır, özünün və övladının xəstəliyi ilə əlaqədar olaraq bütün var-dövləti əlindən çıxıb, hətta evini, maşınını da satıb dava-dərmana xərcləyib. Hər kəlməbaşı "əsas cansağlığıdır, qalan heç nə onu əvəz edə bilməz" deyirdi Könül Xasıyeva. Onun kövrəlməsi Bakının mərkəzində çayxanada oturub verilişə baxanları da kövrəldirdi. Arabir bəziləri də deyirdi ki, dövlətin pulu yoxdurmu Könül Xasıyevanı müalicə etdirməyə? İsrailə aparıb müalicə etdirsələr, vəziyyəti yaxşılaşar. Sonra elə öz açıqlamasından məlum oldu ki, toyların bol vaxtında Könül Xasıyeva yığdığı pullardan 500 min manatını hansısa xanım tanışına borc verib. Amma nəyin qarşılığında, hansı vədlə verdiyini demədi, bir onu bildirdi ki, tanışı vədinə xilaf çıxıb, borcu qaytarmayıb. Hamının təəccübləndiyini görən Könül Xasıyeva onu da əlavə etdi ki, həmin pulu toylarda ifa etməklə yığıbmış, amma özünə qismət olmayıb. Dediyinə görə, borclu olan şəxs pulu az-az da olsa qaytarmağa başlayıb.

Söz arası xalq artisti Rusiyada yaşayan 2 həmyerlimizə ürəkdən minnətdarlıq etdi, bildirdi ki, əgər onların yadrımı olmasaydı, övladı bəlkə də dünyasını dəyişmişdi. Həmin şəxslərdən birinin adını açıqladı, digərini isə yox. Çünki yardım edən adam adının bilinməsini istəmir.

Adamda mərifətə bax ey, o qədər yardım edir, təmənnasız xərc çəkir, hələ adının gizli qalmasını istəyir...

Nə yaxşı ki, elimizin, obamızın belə gözəl, xeyirsevər, yardımsevər insanları var. İstər adının açıqlanmasını istəsin, istər istəməsin, əgər bir adam külli miqdarda pulu qohumu, doğması olmayan bir insanın müalicəsinə, probleminin həllinə sərf edirsə, onun alnından öpüb, bağrımıza basmalıyıq. Görəsən, bu məmləkətdə yaxşılıq edən, kasıblara əl tutan, yardımını əsirgəməyən, xəstələri müalicə etdirən nə qədər yaxşı insan var? Belələri olmasaydı, görün nə qədər insan dərd əlindən, xəstəlik əlindən vaxtsız vəfat edərdi, başqa yollara əl atardı.

Könül Xasıyeva bəzi şeyləri dedi, amma demədikləri də oldu...

Hər gün internetdə yardıma ehtiyacı olan insanların müraciəti ilə rastlaşırıq. Məsələn, bu yazını yazmağa başlamamışdan öncə internetdə bir müəllimənin video müraciətini izlədim. Xəstə övladının ağlayan yerdə videosunu çəkən müəllimə açıqlamasında bildirirdi ki, aldığı maaş övladının müalicəsinə kifayət eləmir. Dediyinə görə, övladı uzun illərdir qan xəstəliyindən əziyyət çəkir və indiyədək edilən müalicələr onun tam şəfa tapması üçün yetərli deyil, xeyirsevər insanların yardımına ehtiyac var.

Öz əlləri ilə övladını ağlayan yerdə videosunu çəkib internetdə xeyirsevər insanların yardım edəcəyi ümidi ilə paylaşan nə qədər insan var bu məmləkətdə? Ola bilər ki, belə müraciət edən insanlar arasında dələduzlar da var, başqa məqsədlər üçün edirlər. Amma böyük əksəriyyət həqiqətən də yardım olunması üçün müraciət edir. Bu müraciətlərə biganə qalmayan, lap 1 manat da olsa yardım edən insanlar var.

Belə videolar var, olacaq. Çünki xəstələr var, olacaq. Bəs dövlətimiz özü nə vaxt bu insanlara sahib çıxacaq? Axı bir iş adamı, yüz iş adamı, lap min iş adamının həll edəcəyi məsələlər deyil bunlar. Əgər belə müraciətlərin, belə xəstələrin sayı artırsa, onda bu barədə də düşünmək üçün gecikmişik. Səhiyyə Nazirliyi, Milli Məclisin deputatları bu barədə düşünməli, təkliflər verməli, nə isə bir çıxış yolu tapılmalıdır. Sanki elə belə də olmalı imiş kimi davranılmamalıdır, çıxış yolu tapılmalı və yaxud ortaq yol müəyyənləşdirilməlidir. Müraciət edən insanlar arasında elələri var ki, onların müalicəsi üçün çox da ciddi məbləğ tələb olunmur, deyək ki, 1000-3000 manat arası vəsait lazımdır. Bunu elə insanlar özləri də toplaya bilər, hansısa iş adamları dəstək verə bilər, ancaq ağır xəstəliyi olanlar da var, onların müalicəsinə daha çox vəsait lazımdır. Bax, heç olmasa bu insanların şəfa tapması üçün dövlətin onlara sahib çıxması lazımdır.

Bu xarici ölkələrin klinikaları ilə qarşılıqlı anlaşma yolu ilə də ola bilər, oradakı həkimlərin bura dəvət olunmaları yolu ilə də. Əsas odur dövlət bu ağır xəstələrin müalicəsi üçün maddi yardım göstərsin, heç olmasa, bir hissəsini öz üzərinə götürsün, qalanlarını isə xeyirsevər insanlar.

Belə olsa, nə Könülün, nə də digərlərinin könülü qırılmaz...

Müəllifin fikirləri öz mövqeyini əks etdirir.

Oxundu: 50

© 2017 - NSPSOLUTIONS