"Rusiya türk pomidorlarını Azərbaycandan alır" İDDİA

Lənkəranda baş həkimin evinə basqın edilib: Ölən var

Azərbaycanda nağd maaş verilməsi qadağan edildi

bazar, 26 mart 2017

Menu

bazar, 26 mart 2017

Yazarlar

Qvami Məhəbbətoğlu

Nəvəm onlara necə dərs verdi

24.03.2017 18:09

Bu Novruz günlərində nəvələrimlə (onlar məndən uzaqda yaşayırlar) birgə olmağa üstünlük verdim. Onlar bizə gələn kimi dediklərinə əsasən plan tərtib etdik.

... İkinci sinifdə oxuyan nəvəm Ofelya və 4 yaşlı Abdulla ilə metronun "Nərimanov" stansiyasında qatara mindik. Bayram günləri olmasına baxmayaraq, vaqonda adam çox idi. Bu səbəbdən uşaqları oturtmaq üçün yer tapa bilmədim. "Gənclik" stansiyasına çathaçatda Ofelya dilləndi:

- Baba, deyək ki, mən bir az böyüyəm, bəs niyə bu adamlardan heç biri qardaşıma yer vermək istəmir? Axı elə indicə verilən elana görə yaşlılara, uşaqlara yer verilmədir. Amma di gəl, heç kimin vecinə deyil.

Sözün düzü, bununla bağlı nə deyəcəyimi bilmədim. Nəvəm bu susqunluğumu görüb əyləşmiş gənclərə üzünü tutdu və soruşdu:

- Bağışlayın, siz əlilsiniz?

Bu gözlənilməz sualdan özlərini itirən gənclər bir ağızdan:

- Yox, - dedilər.

Onlardan biri isə təəccüblə soruşdu:

- Balaca uşaqsan, amma verdiyin suala bax...

Bu zaman Ofelya məni və qardaşını göstərərək hirslə dilləndi:

- Onda ayıb olsun sizə, qarşınızda atanız yaşında kişi uşaqla dayanıb, siz isə... yerinizdən qalxıb yer vermək istəmirsiniz. Məgər sizə oxuduğunuz məktəbdə, yaxud ailənizdə qocalara, uşaqlara belə yerlərdə yer vermək barədə heç nə deyilməyib?

Gənclərin heç birindən səs çıxmadı... Onlardan biri yerindən qalxıb mənə yer verdi...

... Kukla Teatrına çatmağımıza az qalmış Ofelya əlimi buraxaraq bizdən 10-15 metr irəlidə gedən orta yaşlı bir kişinin ardınca yüyürdü. Onun bu hərəkətindən heç bir şey anlamadığıma görə mən də onun dalınca götürüldüm. Ofelya həmin kişiyə çatan kimi dilləndi:

- Əmi, yaxınlığınızda zibil yeşiyi ola-ola siqaret kötüyünü niyə yerə atırsınız?

Həmin adam uşağın bu sualından diksinən kimi oldu... Mən Ofelaya çatanda həmin adam dilləndi:

- Deyəsən, nəvəndir...

Mən sevinə-sevinə:

- Hə, - dedim.

- Elə isə onu başa sal ki, özünü uşaq kimi aparsın...Özündən böyüklərə qarşı nəzakətli olsun. Bir də tanımadığı adama belə məsləhət verməsin...

Nəvəm pis iş tutmuş uşaqlar kimi mənim üzümə baxdı. Abdulla isə ağlamağa başladı. Mən Ofelyanın saçlarını tumarladım... Nəvəm:

- Baba, məgər mən onu təhqir etdim ki, o belə hirsləndi?..

- Yox, sən çox yaxşı iş gördün, onu əməlli-başlı tənbeh etdin...

Nəvəmin gözlərində sevinc parıldadı.

Nə demək istəyirəm? Demək istəyirəm ki, nəvələrinizlə şəhərə tez-tez çıxın. Çıxın ki, onlar bu kimi naqislikləri aradan qaldırmaqda yardımçı olsunlar. Əks halda, ictimai yerlərdə adi qayda-qanunlara əməl etməyənlərin əlindən hələ çox zəncir çeynəyəcəyik.

Oxundu: 373

© 2017 - NSPSOLUTIONS